google-site-verification=J79LKHJflJnTbgueFR9a2kLzUPYCG5JgmVbZXyRfErE
  • WhiskyBros

【#威士忌分享 - 獨立裝瓶廠 (IB)的獨特魅力】

最近WhiskyBros有幸與幾位師兄前輩執杯相聚,討論起 Independent Bottler 獨立裝瓶廠(IB)同Official Bottle原廠裝瓶(OB)有關的問題,因此亦都想同更多朋友去分享一下WhiskyBros對IB同OB嘅一啲諗法。



咩係獨立裝瓶廠 (IB)?

好多新手朋友會問「乜嘢係IB?」

其實IB一般係指本身自身唔生產威士忌嘅品牌,只是向酒廠或者透過代理商購買酒液去裝瓶售賣。而OB則是酒廠自身生產到裝瓶,所以唔同酒廠嘅威士忌可以帶出唔同風格與風味。


IB其實喺蘇格蘭威士忌嘅歷史入邊一早已經佔有相當重要嘅角色。早期係威士忌並未被國際朋友所認知嘅時候,有唔少蘇格蘭威士忌酒廠只係會生產威士忌,直接將一桶桶嘅威士忌售賣比餐廳或者酒商販賣,直到而家雖然威士忌產業越嚟越壯大,受到更加多朋友嘅關注,促使唔少單一麥芽威士忌酒廠嘅發展,但係酒廠依然會將唔需要用咗調配ob威士忌嘅酒液賣比呢啲獨立裝瓶廠,作為收入來源嘅一部份。


好多啱啱接觸IB嘅朋友可能會覺得IB有各式各樣嘅酒標,有陣時會睇到眼花撩亂,但其實大部份嘅IB威士忌酒標都已經標明左IB品牌名稱、酒廠、蒸餾年份、Cask type、Stated age、甚至桶號等等嘅資料,普遍而言酒標上標示嘅酒廠名稱唔可以大過IB品牌自身嘅名稱,而有啲酒廠可能會怕影響OB品牌形象,賣酒比IB嘅時候已經規定咗唔可以標示酒廠名稱,因此酒標上只會顯示出佢地嘅產區,亦都會有一啲IB品牌直接唔會標示原酒來源(好似香港前輩嘅IB- The taste of Ignorance),俾大家估下呢啲「神秘酒廠」似乎都幾有趣得意!



IB = Single Cask Whisky?

新手朋友睇到呢到可能會問,咁IB其實即係所謂嘅「私人包桶」?


其實呢個係絕對錯誤嘅!


首先私人包桶唔一定係IB,OB酒廠亦都會提供一啲私人包桶,OB包桶與IB有所不同,酒標不得有太大嘅改動,仍需要保留酒廠固有的裝瓶風格,Diageo所推出為人熟知嘅Cask of Distinction就是很好嘅例子。其次,IB亦都有唔少調和威士忌,所以單桶威士忌只是IB其中一部份,並唔可以將兩者掛成絕對嘅等號。


WhiskyBros認為IB最大嘅特色就係有非常之豐富多元化嘅威士忌,唔同嘅酒廠,唔同嘅年份,唔同嘅特色同風格都令威士忌世界變得千變萬化,有啲IB系列仲會有特色嘅酒標,亦都係一個好好嘅收藏對象。



點解一般推薦新手飲OB,而非IB?

WhiskyBros認為了解唔同嘅酒廠風格應該從OB入手。OB特別是一啲基本款,一定會調配自己酒廠特色,好似Talisker 強調自己”Made by sea”等等,每個酒廠具備自己強烈嘅特色,先去探索唔同酒廠,新手朋友試多啲亦都可以了解自己鍾意乜嘢風格。與此同時亦提升緊自己對威士忌嘅一個品鑒能力,由於IB款式實在太千變萬化,一款酒有時可能得二百幾支甚至更少,因此可以參考嘅數據並唔多,呢個時候自身嘅品飲能力就較為重要,可以清晰咁樣分辨到唔同嘅味道風格,再判斷自己喜歡與否,令成件事有趣更多!


雖然好多IB選酒人,都係一啲飲咗好多年威士忌嘅前輩,擁有一定嘅品鑒能力與經驗,但飲酒本身就係非常主觀,每個人鍾意嘅嘢都唔同,唔同人唔同嘅經歷對於一支威士忌嘅好與壞又有唔同嘅定義,好似有啲風味造酒者會覺得佢係唔好,但係普飲家可能對佢愛不釋手,因此其實IB冇一個絕對嘅品質保證,穩定性一定遠遠不如OB,相信好多朋友開始玩IB之後都有唔少「中伏」嘅經歷。


IB與OB擁有唔同嘅價值

喺WhiskyBros眼中,威士忌係一直係一件藝術品,你可以透過一支酒去理解背後唔同嘅感受;而喺市場嘅角度,一支酒有人賣有人買,就有佢嘅市場價值,冇絕對嘅好與壞。IB與OB無論係喺市場價值、投資角度都唔一樣,好似一啲知名酒廠推出一啲特別限量嘅OB酒款升值空間一定比IB高,但IB亦都擁有自身複雜嘅趣味性。但係WhiskyBros認為飲威士忌好飲嘅酒咪就係優質嘅作品,理得佢OB定IB!


文章撰寫: Gamma Ng,

相片拍攝: Jerry Law


WhiskyBros會定期分享威士忌資訊與心得,希望令更多香港年輕人接觸並愛上威士忌🥃

更多威士忌文章,盡在WhiskyBros網站

Instagram: www.instagram.com/whiskybros.hk

© 2020 by WhiskyBros