google-site-verification=J79LKHJflJnTbgueFR9a2kLzUPYCG5JgmVbZXyRfErE
  • WhiskyBros

WhiskyShare - 威士忌真係適合用作餐搭嗎?



最近聽聞台灣一位執杯大師準備出一本新書,講述威士忌餐搭,WhiskyBros嘅朋友都應該知道我哋除咗係四隻酒鬼之外,我哋亦都非常之鍾意周圍去食,所以都想表達一下自己嘅諗法。

講到威士忌配餐,其實應該會係一個非常複雜嘅話題,首先我哋知道威士忌嘅風味可以千變萬化,加上唔同嘅食物種類呈現唔同嘅風味,我哋應該係好難去搵到一個Perfect Match,所以真係有心研究呢一方面學問嘅大師,應該真係需要花費唔少嘅時間去對唔同威士忌與食物配搭嘅實驗。

但係如果你問我,威士忌適唔適合配餐?


我一定會答你有太多比威士忌更好嘅選擇! 人嘅味蕾或者嗅覺係品嚐酒與餐之間一定會因一方嘅味道而影響另一方,所以喺WhiskyBros嘅角度會認為一支酒能否適合作為餐搭,在乎於酒與食物能否互相配合,從而使得對方昇華。

舉個例子,比較清淡味道嘅食物,如果你配上一支濃烈味道嘅酒,可能有機會可以突出酒嘅風味,但就會完完全全掩蓋左食物風味上嘅細節。如果你係嘗試利用食物作為一個配角去嘗試昇華一支酒嘅,或者呢個係你眼中會係一個好嘅配合,但如果你想食物與酒雙方都得到昇華嘅時候,呢個就絕對唔會係一個好選擇。

咁點解WhiskyBros會認為有其他酒類比威士忌更加適合配餐呢?

因為一道好嘅菜式無論佢係濃味或是清淡,甜酸苦辣都好,我哋亦都可以從當中品嚐到好多唔同嘅細節。而我哋知道威士忌嘅酒精度係相對地高嘅,WhiskyBros認為有時過度強烈嘅酒精感會影響我哋對食物品嚐嘅時候一啲細緻嘅感覺,所以我覺得 葡萄酒或者 日本清酒 呢一類型嘅酒類可能比起威士忌更加適合用作餐搭。

當然上述都只係講緊威士忌是純飲,咁如果係加水再一杯威士忌水割,或是加上梳打水作成一杯Highball呢?咁樣似乎就唔會因為過高嘅酒精感而掩蓋食物細緻嘅味道,但係不論水割或是Highball都會令一支的威士忌風味表現有所下降。同時,挑選邊一類型嘅威士忌去水割?和配合邊一類型嘅食物?兩者在配合上會產生點樣唔同嘅化學反應?呢幾條問題嘅答案都真係自己要試過先知,呢個亦都係酒與餐其中一個幾有趣嘅地方!

根據自己嘅口味同經驗,WhiskyBros就認為甜嘅食物比較適合配上一杯酸甜風格嘅飲品;帶有酸味嘅食物則配上較甜嘅飲品;帶有苦味嘅食物與帶重果香嘅飲品亦能相得益彰。至於川菜、麻辣火鍋等等辣味食物...WhiskyBros都係選擇飲返啤酒,與威士忌配搭都係留返比勇者師兄挑戰🤣🤣

如果純粹想品飲威士忌嘅話,都係配上一杯清水更為適合。


如果是在一個休閒嘅時候想飲上一杯威士忌,或是與三五知己執杯相聚時,可能我亦都會選擇配上一啲果仁、巧克力等等嘅小食。威士忌適合搭餐與否,可能每個人嘅諗法都唔同,好似一直流傳緊嘅Talisker與生蠔配搭,WhiskyBros感覺上配搭起嚟的確幾有趣,但係試過就算啦,之後喺食生蠔嘅時候可能都係配上一杯香檳或者白葡萄酒,好似更加啱自己口味。

喺最後都係帶返個頭盔先,以上內容純屬WhiskyBros個人主觀口味,對於威士忌與餐搭嘅小小睇法,WhiskyBros有時都會嘗試下喺放鬆嘅情況下都會嘗試利用唔同嘅威士忌搭配唔同嘅菜式,但認真品嚐一支威士忌或者品嚐一道菜色嘅話就未必會用烈酒去搭配,以上內容都係經驗同埋自己嘅口味所得。

WhiskyBros會定期分享威士忌資訊與心得,希望令更多香港年輕人接觸並愛上威士忌🥃

記得訂閱 WhiskyBros 獲取最新的威士忌情報與文章!

Facebook: www.facebook.com/WhiskyBrosHK

Instagram: www.instagram.com/whiskybros.hk

圖: Jerry Law 撰文: Gamma Ng

© 2020 by WhiskyBros